Eduardo De Filippo, È trasuta !

EDUARDO DE FILIPPO

(Un omaggio alla primavera)

È TRASUTA!

È trasuta e s’è stennuta
ncopp’ ‘o fierro d’ ‘a ringhiera
d’ ‘o balcone;
e c’ ‘o naso nfacci’ ‘e llastre
po’ c’ ‘a fronte
e po’ c’ ‘a faccia
se smerzava
se girava
s’avutava ‘a ccà e ‘a llà
pe’ da’ n’uocchio dint’ ‘a casa.
Ll’aggio vista,
aggio araputo:
“Finalmente si’ turnata!
Trase, trase! ”
Essa è trasuta.
S’è menata
longa longa p’ ‘e riggiole,
s’è mpezzata
sott’ ‘e pporte
‘e ll’ati stanze,
senghe senghe s’è mpezzata.
Che t’ha fatto nfacci”e mure,
che friscura c’ ‘a purtato
tuorno tuorno
for’ ‘a loggia
mmiez’ ‘e ppiante!
A migliare
ll’uocchie ‘e luce
‘a miez’ ‘e ffronne
se menaveno pe’ terra.

No? E chi era?
Nun er’ essa…
E che, so’ scemo?
Io me sento n’atu ttanto
quanno trase primmavera!

Eduardo De Filippo

***